To order your flowers call 1-800-464-9889

Sagan

Hjónin Sigrún Elfa Reynisdóttir og Ingólfur Guðnason útskrifuðust frá ylræktardeild Garðyrkjuskóla ríkisins á Reykjum vorið 1980. Sigrún er auk þess búfræðingur og leikskólakennari að mennt. Þau stofnuðu Garðyrkjustöðina Engi árið 1985 og ræktuðu fyrst um sinn tómata og útimatjurtir en síðan bættist við ræktun garðplantna og sumarblóma. Um tíma var Engi með fjölbreytta garðplönturæktun og var þátttakandi í átaki í framleiðslu á skógarplöntum á Suðurlandi upp úr 1990.

Kryddjurtaræktun hófst á Engi 1989. Í upphafi var ræktunin í litlum mæli því ferskar kryddjurtir voru þá nánast óþekkt vara í matvöruverslunum. Talsvert átak var að koma þeim á markað í fystu og tók kynning á vörunni talsverðan tíma, m.a. með því að kynna veitingamönnum og innkaupafólki í verslunum nýjar tegundir
sem ekki höfðu verið í boði.

Dæmi um nýjar tegundir frá Engi á þessum árum eru basilíka, kóríander, klettasalat (rucola), rósmarín og oregano (bergmynta). Síðan bættust við fleiri tegundir og nú eru að jafnaði í sölu um 15 tegundir kryddjurta, auk þess sem sífellt er verið að gera tilraunir með nýjar tegundir.

Á Engi var hafin tilraunaræktun á íslensku lækningajurtinni ætihvönn árið 1994. Tóku eigendurnir þátt í stofnun fyrirtækisins SagaMedica sem framleiðir í dag úrval náttúrulyfja úr íslenskri ætihvönn, sem er nú útflutningsvara, t.d. á Norðurlöndum, Þýskalandi og í nokkrum löndum Asíu.

Síðan 1994 hefur öll ræktun á Engi verið lífræn, vottuð af Vottunarstofunni Túni.

Nú er þar stunduð ræktun kirsuberjatómata og fjölda kryddjurta og salattegunda, einnig útiræktun matjurta og ávaxtarækt. Frá sumrinu 2009 hefur verið starfræktur bændamarkaður á Engi, og hefur hann fengið frábærar viðtökur. Hér má lesa frekar um markaðinn.

Grasnytjar
Ingólfur hefur lagt sig eftir grasnytjafræði og má teljast sérfróður um garðyrkjusögu Íslands. Hann hefur séð um standsetningu jurtagarðs í Skálholti árið 2004 og er auk þess ráðgjafi ýmissa þeirra stofnana sem vilja halda á lofti garðræktarmenningu landsins, t.d. Norræna hússins, Ólafsdalsfélagsins og Lækningaminjasafnsins í Nesstofu á Seltjarnarnesi. Ingólfur hefur einnig haldið fjölda námskeiða um ræktun og garðyrkjusögu.

Ingólfur situr í nefnd Norræna genabankans um íslenskar nytjajurtir og hefur verið í stjórn Græna geirans frá stofnun hans, en það eru regnhlífarsamtök allra þeirra félaga sem tengjast garðyrkju, t.d. skrúðgarðyrkju, landslagsarkitekta, garðyrkjustjóra o.fl. Hann tók þátt í stofnun félagsins Matur – saga – menning, sem hefur frá stofnun árið 2004 lagt sig eftir að halda á lofti íslenskri matarmenningu og matarhefð, þar með talið garðyrkjuafurðum og sögu þeirra.

Árið 2010 hlutu Ingólfur og Sigrún Hvatningarverðlaun garðyrkjunnar. Ræðu menntamálaráðherra við afhendingu verðlaunanna má lesa hér.